ᑐᓴᕋᔅᓴᖅ
ᒫᑦᓯ 20, 2012
ᖃᒡᒋᐊᕘᒃᑯᑦ ᐸᕐᓇᑉᐳᑦ ᑲᑎᒍᑎᖃᓛᕐᓗᑎᒃ ᑕᑯᕋᓐᓈᕐᕕᔅᓴᐅᑉ ᒥᑦᓵᓄᑦ
ᐃᖃᓗᐃᑦ: ᖃᒡᒋᐊᕘᒃᑯᑦ ᓱᓴᐃᔭᑎᒃᑯᖏᑦ ᓄᓇᕗᒻᒥ ᑕᑯᕋᓐᓈᕐᕕᔅᓴᒧᑦ ᐸᕐᓇᐸᓪᓕᐊᕗᑦ ᔫᓂᐅᓕᖅᐸᑦ ᐃᖃᓗᓐᓂ ᑲᑎᒍᑎᖃᓛᕐᓂᐊᓂᕐᒥᓄᑦ ᒥᑦᓵᓄᑦ ᑕᑯᕋᓐᓈᕐᕕᔅᓴᐅᑉ. “ᑲᑎᓐᓂᕆᓛᖅᑕᕗᑦ ᓯᕗᓪᓕᖅᐹᑦᑎᐊᒥᒃ ᐊᑕᐅᑦᑎᒨᖅᑎᑦᑎᓂᐅᓛᕐᒪᑦ ᖃᒡᒋᐊᕘᒃᑯᓐᓄᑦ ᑲᑎᒪᔨᐅᔪᓂᒃ ᐊᒻᒪᓗ ᑲᑎᒪᔨᕋᓛᖑᔪᓂᒃ, ᐊᔩᕋᖃᑎᒌᓛᕐᓗᑎᒃ ᑕᑯᓐᓇᖑᐊᒐᕐᒥᓐᓂᓪᓗ ᓂᓪᓕᐊᖃᑎᒌᒍᑎᖃᓛᕐᓗᑎᒃ ᑕᑯᕋᓐᓈᕐᕕᔅᓴᖅ ᓄᓇᕗᒻᒥᐅᓄᑦ ᐊᑑᑎᖃᑦᑎᐊᕈᓐᓇᖁᓪᓗᒍ,” ᐅᖃᖅᐳᖅ ᖃᒡᒋᐊᕘᒃᑯᑦ ᑐᑭᒧᐊᑦᑎᑦᑎᔨᖓᑦ ᓛᑯᓗᒃ ᕚᑐᕆ. ᑕᐃᓐᓇ ᑲᑎᓐᓂᐅᓛᖅᑐᖅ ᐱᒋᐊᕈᑎᓪᓚᕆᐅᓛᕐᓂᖓ ᓂᕆᐅᓇᕐᒪᑦ ᖃᐅᔨᓴᕐᓂᕆᓛᖅᑕᑎᓐᓄᑦ. ᑖᓐᓇ ᖃᐅᔨᓴᕐᓂᕆᓂᐊᖅᑕᕗᑦ ᓇᓗᓇᐃᖅᓯᔪᒫᕐᒪᑦ ᑲᔪᓯᑦᑎᐊᕈᓐᓇᕋᔭᕐᒪᖔᑦ ᑕᑯᕋᓐᓈᕐᕕᔅᓴᖅ ᖃᓄᐃᑦᑑᓗᓂ.
ᑲᑎᓐᓂᐅᓂᐊᖅᑐᖅ ᐃᑲᔪᖅᑕᐅᔾᔪᑎᖃᖅᐳᖅ ᓄᓇᕗᑦ ᒐᕙᒪᑦᑎᓐᓂᑦ ᐊᒻᒪᓗ ᑲᓇᑕᒥ ᑲᑎᒪᔨᐅᔪᓄᑦ ᓴᓇᙳᐊᓂᕐᒧᑦ ᑕᑯᕋᓐᓈᑎᑦᑎᓂᕐᒧᓪᓗ.
“ᐊᐱᖅᑯᑎᓪᓗᐊᑕᕆᓛᕐᒥᔭᕗᑦ ᐋᔩᐃᖃᑎᒌᓕᕈᑦᑕ ᑕᑯᕋᓐᓈᕐᕕᖃᕐᓂᕈᑦᑕ ᖃᓄᖅ ᐱᕚᓪᓕᑦᑎᒐᔭᕐᒪᖔᑦ ᓄᓇᑦᑎᓐᓂᒃ ᐊᒻᒪᓗ ᑲᓱᖅᑎᑦᑎᓂᖅᓴᐅᒐᔭᕐᒪᖔᑦ ᑕᑯᕋᓐᓈᑎᑦᑎᕙᑦᑐᓂᒃ ᓄᓇᖅᑲᑎᒌᙱᑦᑐᓂᒃ,” ᐅᖃᖅᑐᖅ ᐃᑦᓯᕙᐅᑕᐅᑉ ᐊᐃᑉᐹ ᐃᐊᓚᓐ ᕼᐋᒪᑎᓐ.
“ᓄᓇᕗᒻᒥᐅᑦ ᐃᓪᓗᖁᑎᖃᕆᐊᖃᓪᓚᕆᒻᒪᑕ ᐱᔪᒥᒃ ᓇᒥᒥᐅᑕᐅᓂᑦᑎᓐᓂᒃ ᓇᓗᓇᐃᒃᑯᑕᐅᔪᒥᒃ ᑭᒡᒐᖅᑐᐃᔪᒥᓪᓗ ᐅᖃᐅᓯᑦᑎᓐᓂᒃ, ᐃᓕᖅᑯᓯᑦᑎᓐᓂᒃ, ᓴᓇᑐᓂᑦᑎᓂᓪᓗ,” ᐅᖃᕆᕗᖅ ᐃᑦᓯᕙᐅᑕᐅᑉ ᐊᐃᑉᐹ ᓖᓇ ᐃᕕᒃ.
ᑲᑎᓐᓂᐅᓛᖅᑐᖅ ᐱᕕᖃᖅᑎᑦᑎᓂᐅᓛᕆᕗᖅ ᑕᑯᓐᓇᑎᑦᑎᕙᑦᑐᓄᑦ ᑎᒥᖁᑕᐅᔪᓄᓪᓗ, ᐊᑑᑎᖃᕐᓂᕆᒐᔭᖅᑕᖓ ᖃᓄᖅ ᐃᓱᒪᒋᔭᐅᒻᒪᖔᑦ ᓄᓇᕗᒻᒥᐅᓄᑦ. ᖃᒡᒋᐊᕘᒃᑯᑦ ᐊᐃᑉᐱᐅᑎᔪᒥᒃ ᑐᓂᓯᓛᕆᕗᑦ ᐃᓕᓴᕆᔭᐅᔾᔪᑎᒥᒃ ᐱᕚᓪᓕᑎᑦᑎᖃᑦᑕᖅᑐᒧᑦ ᑕᑯᓐᓇᑎᑦᑎᓂᒃᑯᑦ ᓄᓇᕗᒻᒥ.
-30-
ᑐᑭᓯᒋᐊᒃᑲᓂᕐᕕᔅᓴᖅ ᐅᓇ:
ᓛᑯᓗᒃ ᐅᐃᓕᐊᒻᓴᓐ ᕚᑐᕆ, ᑐᑭᒧᐊᑦᑎᑦᑎᔨ
laakkuluk@qaggiavuut.ca
867 222 6414
